二十歲！！！

20歲嘞！20歲嘞！！

20年前根本都冇話識唔識得去諗有冇哩一日。

最初睇嘅資料話家養嘅巴西龜一般壽命20至30歲，咁可能仲會養多10年！

20年真係好長嘅日子，最初互聯網唔係好發達，可以搵到關於巴西龜嘅資料更加少之又少；本地嘅資料只可以上 forum 睇下其他人嘅分享，真係真假難分，依家『兩爬協會』都好有規模，會教育大眾、會安排領養巴西龜，以前只會去金魚街買； 以前龜有病似乎只可以去大圍睇西人獸醫，而家好唔同，多咗好多好多獸醫診所，而且土瓜灣有個好好嘅港人獸醫；依家動物嘅權益好咗好多，雖然仲有所謂『放生』嘅行為，但係都好似避忌咗好多。時代係不斷咁進步嘅，相信已經好多人識得點樣養巴西龜喇，希望呢個進步 keep 住落去，唔好走回頭路，咁巴西龜就可以得到適當嘅照料，唔好再白白咁受苦。

兩隻龜龜今年嘅生日禮物係急凍三文魚，真係唔好意思，今年真係好忙，冇去買新鮮嘅魚仔或者蝦仔。今年細狗狗唔係好舒服，始終都17歲喇、年紀大喇，就好似幾年前照顧大狗狗一樣，用咗好多時間同埋心機。

養龜養咗20年， 同大部分人一樣，喺20年嘅人生裡面發生咗好多事，長輩們先後過世、大狗狗亦都過咗身、身體開始多毛病、領會倒人嘅自私險惡、利益衝突、人與人之間嘅關係破裂、工作嘅轉變、搬屋搬咗好幾次，始終冇變嘅就係每次搬屋都帶住兩個龜缸一齊搬，話時話，呢兩個龜缸真係襟用。 

雖然人生不能盡如人意，喺有限嘅條件之下，兩隻龜都可以喺我哋照顧之下活超過20年，點講我哋都係蒙福嘅，多謝造物主上帝俾呢個世界上有動物、俾我哋有能力照顧佢哋，唔需要迫於無奈放棄佢哋。

因為太忙嘅關係，今次用 Google 語音輸入法，所以全篇都係用廣東話寫嘅。